"Azərbaycan xəritəsi kimi bütöv qartal olsun" - Video - Foto


  • 12:00 / 06 06 2020 |
  • Bölmə: Gündəm / İstedadlar


Mahmudzadə Eltac Rupor.az saytının təqdim etdiyi "İstedadlı uşaqları üzə çıxaraq" layihəsinin 7-ci qonağıdır. 
Xırdalan şəhər 7 nömrəli tam orta məktəbin 5-ci sinifində oxuyur. Rəqs edir, mütaliəyə həvəsi böyükdür, ölkəsini dünya bilir və daha nələr... 
Kiçik müsahibədə böyük ideallardan bəhs edən Eltacı yaxından tanıyaq. 

 
- Eltac, dərslərini necə oxuyursan? 

- Yaxşı oxuyuram. Həm də dərslərimdən əlavə mənim çoxlu bədii kitablarım var. İlk kitabımı atam ad günümdə alıb. Kitab oxumağı sevirəm.

- Hansı kitabdır?

- Robert Lyuis Stivensonun "Dəfinələr adası" kitabıdır. İki dəfə oxumuşam, yenə oxuyacam. Əsərdə olan hadisələrin iştirakçısı olmaq istəyirəm. 

- Sən həm də rəqslə də məşgulsan? 

- Bəli, mən rəqs etməyi çox sevirəm. Karantin olmasaydı, 23 mayda Türkiyədə keçirilən bayramda iştirak edəcəkdik.

- Edəcəkdiz? Kollektiviniz də var?

- Əlbəttə. Mən "Günəş" Tədris Mərkəzi rəqs dərnəyinin üzvüyəm. Güclü kollektivimiz var. Rəqs müəllimimiz Kazım Bağırovdur. Kazım müəllim rəqsin elementləri ilə yanaşı onun fəlsəfəsini də bizə izah edir. Deyir ki, sənətini sevməsən, onu hiss etməsən uğur qazana bilməzsən. Bizm kollektivin uğurlarının kökündə Kazım müəllimin məsləhətləri, tövsiyələri dayanır. 

- Eşitmişəm səni rəqsə hansısa bir təsadüf gətirib. Bizimlə bölüşə bilərsən?

- Qısa deyəcəm. Bir gün həkimə getdik, yoxladı və məsləhət bildi ki, rəqslə məşgul olum. Rəqsin sağlamlığa böyük fayda verdiyini dedi. Rəqs dərnəyinə yazıldım və az müddət keçdi rəqs həyatımın bir parçası oldu.

- Hansı kitabları oxuyursan? 

- Ən çox tarixi kitabları sevirəm, hərbdən, müharibədən bəhs edən əsərləri xoşlayıram.

- Gələcəkdə hansı sənəti seçmək istərdin? 

- Mən əvvəl əsgər olmaq istəyirəm. Mərhum Milli Qəhrəman jurnalist Çinguz Mustafayev kumirimdir .Onun ölüm səhnəsinə dəfələrlə baxmışam. Kamera əlindən sürüşür düşür və o, harasa yuvarlanır. Amma ekranda yenə səsi gəlir. O kadrlar mənə həm pis təsir edir, həm də düşmənə qarşı intiqam hissini alovlandırır.

- Səncə dünya nə boydadı, nə rəngdədir? 

- Dünya böyükdür. Mənim dünyam öz ölkəmdir. Cox istərdim ki, Azərbaycan xəritəsi kimi bütöv qartal olsun. O xəritənin hər yerinə gedə bilək. Azərbaycan bütöv, sağlam qartal olsun. İndi elə bil qartal yaralanıb, xəstələnib, belə olduğuna görə dünyanın rəngini dəqiq görə bilmirəm. Qartal sağalacaq, mütləq sağalacaq, bax onda dünyanın hansı rənglərə büründüyünü aydın görəcəm. 

Ayna Məmmədova




















Oxşar xəbərlər