“Bakının Xətai rayonu, 25 saylı tam orta məktəbdə oktyabrın 2-si iki 6-cı sinfi birləşdirərək 41 şagirdlik sinif formalaşdırıblar”. 

Bu şikayətlə “Qafqazinfo”ya məktəbin 6C sinfinin valideyn və şagirdləri müraciət ediblər.

Onların sözlərinə görə, sinif otağında 41 sagird üçün yer yoxdur. Otaqda sıxlıqdan yaranan havasızlıq  müxtəlif xəstəliklərin yayılmasına da zəmin yaranır: “Bir tərəfdən də pandemiyanın tam bitməməsi, müəllimlərin şagirdlərin çoxluğundan, fiziki olaraq və vaxt baxımından şagirdlərlə lazımı dərəcədə məşğul ola bilməməsi səbəbindən bütün valideyin, şagird və müəllimlərin haqlı narazılığı yaranıb.

Məktəb rəhbərliyi yuxarı instansiyaların lazımı tədbir görmədiyini və məktəbin əlavə tədbirlər görməyə imkanı olmadığını bildirir. Yəni müəllimlərə əlavə dərs saatlarının verilməsi, bununla da əmək haqlarına əlavələrin olunması və s... Bununla bağlı oktyabrın 3-də məktəb rəhbərliyinə müraciət etmişik. Artıq 4 gündür, 6C sinfində davamiyyət cəmi 5% təşkil edir”.

Məsələ ilə bağlı 25 nömrəli tam orta məktəbə sorğu ünvanladıq. Təhsil müəssisəsindən müraciətimizə belə cavab verildi: “Qeyd olunan siniflərdə şagird sayı ərazidə yaşayan uşaqların icbari təhsil hüququnun təmin olunması nəzərə alınaraq müəyyənləşdirilib. Məktəbin mövcud şəraiti imkan vermədiyinə görə qeyd edilən sinifləri bölmək mümkün olmayıb. Hazırda şagirdlərin dərsə davamiyyəti qənaətbəxşdir”.