"Regionun bütün dövlətlərinə açıq mesaj verildi" - Azay Quliyev


  • 18:20 / 22 06 2021 |
  • Bölmə: Gündəm


Azərbaycanla Türkiyə arasında müttəfiqlik münasibətləri haqqında “Şuşa Bəyannaməsi”nin imzalanmasından bir həftə ötsə də, bu tarixi sənədin əhəmiyyəti haqqında müzakirələr hələ də davam edir.

"Rupor" xəbər verir ki, bunu deputat Azay Quliyev bildirib.

O qeyd edib ki, qardaş ölkələr arasında bütün sahələrdəki  münasibətlərin müttəfiqlik səviyyəsinə yüksəlməsini özündə ehtiva edən bu sənəd  ilk növbədə İkinci Qarabağ savaşından sonra regionda geosiyasi vəziyyətin və güc balansının Azərbaycanın və Türkiyənin xeyrinə dəyişməsini rəsmiləşdirdi:
“Şuşada Türkiyənin Baş konsulluğunun açılması xəyal deyil, artıq reallıqdır. Türkiyə və Azərbaycan bir-birinin təhlükəsizliyinə zəmanət verməklə,  üçüncü ölkə və ya ölkələr tərəfindən təcavüzə və  ya hücuma məruz qalacaqları təqdirdə birgə cavab vermək öhdəliyi götürməklə Ermənistanın və onun havadarlarının revanşist planlarını birdəfəlik alt-üst etdilər.

Başqa sözlə, regionun bütün dövlətlərinə açıq mesaj verildi ki, bu bölgədə  güc tətbiq etmənin və ya müharibə haqqında düşünmənin heç bir perspektivi yoxdur. Əksinə, bundan sonra Cənubi Qafqazda qalıcı sülhü  və barışı bərqərar etmək məqsədlə birgə əməkdaşlığa başlamaq hamının yararınadır. ATƏT-in Minsk üçlüyü və digər beynəlxaql təşkilatlar da bu faktı mütləq nəzərə almalıdırlar”.

Deputat 15 iyunda imzalanan Şuşa Bəyannaməsinin Ermənistanda iki gün öncə keçirilən parlament seçkilərinin nəticələrinə təsirsiz ötüşmədiyini qeyd edib:
“Belə ki, Şuşanı və Hadrutu alacağını bəyan edən Robert Koçaryanın və onun avantürasının hansı faciə ilə nəticələnəcəyini yaxşı başa düşən erməni xalqı bu caniyə səs vermədi. İlk baxışdan paradoksal görünsə də, ermənilər İkinci Qarabağ savaşında acı məğlubiyyətə uğramış və kapitulyasiya aktına imza atmış Paşinyanı dəstəkləməklə  regionda yaranmış yeni reallığı və Qarabağa olan əsassız iddialarının davam etməsinin mənasız olduğunu qəbul etmiş oldular.

Şuşa Bəyannaməsində Avropa ilə Asiyanı yeni marşurutla birləşdirəcək Zəngəzur dəhlizinin açılması haqqında ayrıca bəndin olması bir daha onu göstərir ki, bu prosesin həyata keçirilməsində əsas söz sahibi Azərbaycan, Türkiyə və Rusiyadır, bu məsələdə Ermənistanın iştirakı formal xarakter daşıyır və ciddi əhəmiyyət kəsb etmir. 

Həmçinin, Şuşa Bəyannaməsi Qarabağın yenidən qurulması və inkişafına daha çox xarici investorların cəlb olunmasına və qoyulan sərmayənin təhlükəsizliyinə əlavə  zəmanətdir.

Bəzi xarici ekspertlərin və siyasətçilərin iddialarının əksinə olaraq onu da qeyd etmək lazımdır ki, Şuşa Bəyannaməsi 3-cü dövlətə qarşı deyil, ən azından Azərbaycanın ərazi bütövlüyünü və təhlükəsizliyini təhdid etmək fikrində olmayan hər hansı bir ölkənin bu sənəddən narahat olması üçün heç bir əsas yoxdur.

Nəhayət, regionun gələcək taleyini bəlirləyən, bölgə xalqlarının rifah və sülh içində yaşaması üçün real perspektivlər yaradan Şuşa Bəyannaməsi hər iki ölkə Prezidenti cənab Əliyevin və cənab Ərdoğanın tarixi nailiyyəti, eyni zamanda siyasi və diplomatik qələbəsidir”. (modern.az)




Oxşar xəbərlər