"Səbail Məhkəməsi barəmdə 3 aylıq həbs qətimkan tədbiri seçdi. Həbsdə olduğum dövrdə Şıxəliyev Gömrük Komitəsinə sorğu yazaraq, mənə məxsus malların qaçaqmal olmasını təsdiqlətmək, özlərinin cinayətlərinə Gömrük Komitəsini də şərik etmək istəyirdi".

"Rupor" "Qafqazinfo"ya istinadən xəbər verir ki, bu ittiham zərərçəkmiş Sərdar İsmayılov ləğv edilmiş Milli Təhlükəsizlik Nazirliyinin (MTN) Baş İstintaq İdarəsinin rəisi, general-mayor Mövlam Şıxəliyev, onun müavini Yasin Məmmədov və idarənin şöbə rəisləri Vüsal Ələkbərovla Sahib Ələkbərovun cinayət işi üzrə məhkəmə prosesində ifadə verərkən deyib.  

Bildirib ki, ona qarşı qanunsuz sahibkarlıq (29,192.2.2.) və qaçaqmalçılıq (206.3.2.) maddələri ilə istintaqı qanunsuz olaraq davam etdirdilər: 

"Bu gün bu zalda boynumdan qucaqlayan Yasin Məmmədov orada özünü vəzifəli şəxs kimi deyil, küçədə yol kəsən quldur kimi aparırdı.Yasin Məmmədovun bircə tələbi vardı - pul ver, səni azad edək. Deyirdi, pul verməsən, burada çürüyəcəksən! İstintaq zamanı bizə sonsuz təzyiqlər göstərirdilər. Hətta mənim telefonumda adı olan adamları da çağırıb incidiblər. Mənə borcu olan adamlara hədə-qorxu gəlib pullarını alıblar, həbsə atıblar, olmazın işgəncə veriblər".

Zərəçəkənin sözlərin görə həbsdən çıxandan sonra araşdırıb ki, 650 min manat dəyərindəki mallarını müsadirə etdikdən sonra Yasamalda MTN-in anbarına yerləşdiriblər: 

"Sonra da həmin malları özləri satıblar. Mövlam Şıxəliyev və digərilərinin barəsində qanunun imkan verdiyi qədər sərt cəza verilməsini, dəymiş maddi və mənəvi ziyanımın ödənilməsini tələb edirəm".

Sərdar İsmayılov şəriki Orxan Abdullayevlə Çindən satış məqsədilə pirotexniki vasitələr gətirib satmaqla məşğul olub.

İttihama görə, Mövlam Şixəliyev MTN-də İstintaq Baş İdarəsinin rəisi vəzifəsində çalışdığı 2008-2014-cü illərdə qeyd edilən qurumun tərkibindəki şöbənin sabiq rəisi Vüsal Ələkbərov, İbtidai istintaq idarəsinin sabiq rəis müavini Yasin Məmmədov, şöbə rəisinin sabiq müavini Sahib Ələkbərov ilə mütəşəkkil dəstə tərkibində iş adamlarından hədə-qorxu yolu ilə külli miqdarda pul tələb ediblər.

İstintaqla M.Şixəliyevin mütəşəkkil dəstə halında ümumilikdə 14 milyon 292 min manat məbləğində pul vəsaitini rüşvət qismində, 5 milyon 77 min manat məbləğində özgə əmlakını hədə-qorxu ilə tələb edib almasına sübutları saxtalaşdırmasına əsaslı şübhələr müəyyən edilib və barəsində həbs qətimkan tədbiri seçilib.

Cinayət işi üzrə 32 zərərçəkmiş var.



Oxşar xəbərlər