Qarabağ əlilinin pensiyası niyə kəsilib? - Rəsmi cavab verildi


  • 11:43 / 16 02 2022 |
  • Bölmə: Hadisə / Şikayət


“I Qarabağ müharibəsi zamanı, 1994-cü ilin aprelində Ağdam uğrunda döyüşlərdə ağır yaralanmışam. O vaxtdan da fiziki iş qabiliyyətimi itirmişəm. 17 ildən artıq əlil kimi pensiya alsam da, ötən ilin avqustundan pensiyam kəsilib”.

"Rupor" xəbər verir ki, bu barədə “Qafqazinfo”ya Quba rayonunun Bağbanlı qəsəbəsindən olan I Qarabağ müharibəsi döyüşçüsü Manafov Arif Mustafa oğlu müraciət edib.

O bildirir ki, hazırda sağlamlığı ilə bağlı ciddi problemlər olsa da, pensiya ala bilmir: “1994-2004-cü illərdə-10 il ərzində mənə əlillik verilməyib. Prezidentinə müraciət etdikdən sonra məni həkim komissiyasından keçirdilər və 2004-cü ildən 3-cü qrup əlillik təyin etdilər. Getdikcə səhhətimdə ağırlaşmalar olduğuna görə təyinat dəyişdirildi və 2-ci qrup əlillik təyin olundu. 2021-ci ilə qədər II qrup əlil kimi pensiya aldım. Ötən ilin avqustunda həkim komissiyasından keçsəm də, 6 aydır əlillik təyin olunması barədə bir xəbər yoxdur. Özüm xəstəyəm, övladım nevroloji xəstədir. Fiziki iş görmə qabiliyyətim olmadığına görə aldığım pensiyadan başqa gəlir yerimiz yoxdur. Çox çətin vəziyyətdə qalmışıq, evimə ərzaq, övladımın, özümün dərmanlarımızı ala bilmirəm”.

A.Manafov həmçinin bildirir ki, maddi çətinliklər səbəbindən 1 aydır övladını məktəbə apara bilmir.

Problemlə bağlı Dövlət Tibbi-Sosial Ekspertiza və Reabilitasiya Agentliyinə müraciət etdik. Agentliyin mətbuat katibi Tural Qurbanov A. Manafovun əlillik müddətinin 27.07.2021-ci il tarixdə başa çatdığını bildirdi. Onun sözlərinə görə, A. Manafovun əlillik səbəbi Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar olduğu üçün o, 12.01.2022 tarixində Dövlət Tibbi-Sosial Ekspertiza və Reabilitasiya Agentliyində əyani müayinəyə cəlb edilib: “Əyani müayinə zamanı şəxsin xəstəliyinin hərbi səbəblə əlaqəli olmasını təsdiq edən Mərkəzi Hərbi Həkim Komissiyasının qərarının olmadığı müəyyən edilib. Həmin qərarı Agentliyə təqdim etməli olduğu A.Manafova bildirilsə də, o, hələ də təqdim etməyib. Qeyd edilən qərarı Agentliyə təqdim etdiyi təqdirdə, onun əlilliyi ilə bağlı qanunvericiliyə müvafiq olaraq qərar veriləcək”.




Oxşar xəbərlər