Altı ildir həbsdə olan sabiq deputat Dünyamin Xəlilov və iş adamı Azad Cavadovun cinayət işi üzrə məhkəmə istintaqı başlayıb.

AZİNFORM.AZ-ın məlumatına görə, Bakı Ağır Cinayətlər Məhkəməsində keçirilən iclasda “Aqrarkredit” ASC-nin nümayəndəsi vəsatət qaldıraraq mülki iddiaçı qismində tanınmalarını istəyib.

Kredit təşkilatı iddia edir ki, təqsirləndirilən şəxslərin əməllərinə görə onlara 17 milyon 735 min manat ziyan dəyib.

Məhkəmə vəsatəti əsaslı hesab edərək təmin edib. Qərara əsasən, “Aqrarkredit” ASC mülki iddiaçı kimi tanınıb. Prosesin davamında prokuor ittiham aktını elan edib.

İttihama görə, Dünyamin Xəlilov və Azad Cavadov 2001-2015-ci illər ərzində “Azərbaycan Beynəlxalq Bankı” ASC-nin sabiq rəhbər vəzifəli şəxsləri ilə birgə sabit cinayətkar qrup yaradaraq ümumilikdə 6 milyon 642 min manatdan artıq məbləğdə pul vəsaitini mənimsəyiblər.

Qeyd olunan əməllərə görə, D.Xəlilov və A.Cavadova Cinayət Məcəlləsinin 179.3.1 və 179.3.2-ci (mütəşəkkil dəstə tərəfindən və külli miqdarda mənimsəmə) maddələri ilə ittiham irəli sürülüb.

Dünyamin Xəlilov və Azad Cavadov verilmiş ittihamlara münasibətdə özlərini təqsirli bilməyiblər.

Proses oktyabrın 17-də davam etdiriləcək.

Qeyd edək ki, təqsirləndirilən şəxslərin hər ikisi məhkumdur.

Dünyamin Xəlilov 2017-ci ildə Bakı Ağır Cinayətlər Məhkəməsinin hökmü ilə 13 il, Azad Cavadov isə 10 il 11 ay müddətinə azadlıqdan məhrum ediliblər.

Onlar Cinayət Məcəlləsinin 179.3.1 (mənimsəmə, mütəşəkkil dəstə tərəfindən törədildikə), 179.3.2 (mənimsəmə külli miqdarda törədildikdə), 213.2.1 (vergidən yayınma, mütəşəkkil dəstə tərəfindən törədildikdə, 213.2.2 (vergi ödəməkdən yayınma külli miqdarda törədildikdə), 32.4, 308.2 (vəzifə səlahiyyətlərindən sui istifadə etməklə ələ alma) 32.4, 309.2 (vəzifə səlahiyyətini aşma) maddələri ilə təqsirli bilinib.

D. Xəlilov 2005-ci ildə Beynəlxalq Bankın səhmdarı olub. 2005-2010-cu illərdə deputat olan Dünyamin Xəlilov, həm də bankın rəhbəri olmuş Cahangir Hacıyevin qohumudur və işçisi olub. C.Hacıyevə məxsus “Şəki Bazar” və “Şəki Ət Kombinatı” ASC-ni uzun müddət D. Xəlilov idarə edib. /qafqazinfo/