“Çətin olsa belə, farağat oturmağı bacardım”


  • 12:00 / 24 04 2020 |
  • Bölmə: Gündəm


Parlamentin ilk iclasında Prezidentin xarizması Razi Nurullayevi həyacanlandırıb  

Azərbaycan Xalq Cəbhəsi partiyalarından birinin sədri Razi Nurullayev 2020-ci il parlamentinin üzvü oldu. Siyasətçi daha bir siyasət meydanına girdi. Razi bəyə bir neçə sual ünvanladıq, müsahibə deyil, münasibət xarakterli yazı olacağını da öncədən xatırlatdıq. Bir cümlə ilə cavab verdi: “Jurnalistikanın müxtəlif janrlarında yazı oxumaq xoşdur, o məqalənin qəhrəmanı olmaq  zövq verir”. 
Razi Nurillayevə öncə “Azərbaycan siyasətinin mənzərəsini təsvir etmək üçün bir neçə cümlə kifayət edər, yoxsa təqdimata saatlarla vaxt lazmıdır” sualı ilə müraciət etdik. Cavaba uzaqdan başlasa da yaxında bitirdi. İki insan tipinin olduğunu dedi: saatlarla danışıb, fikrini çatdıra bilməyən və bir neçə cümlə ilə romanın məzmununu açmağı bacaran. Siyasətə daha çix birinci kateqoriyalı insanların qiymət verdiyini diqqətə çatdırdı və onları qınamağa ehtiyac olmadığını belə əsaslandırdı: “Siyasətimizin mənzərəsini təsvir etmək üçün hər gün yüzlərlə məqalə yazılır, yüzlərlə adam danışır, amma hələ də mənzərə aydın deyil. Olsa idi, sual verməzdiniz. Çünki, gizlində gedən proseslər açıqda baş verəndən daha çoxdur. İstər bir neçə cümlə, istər də saatlarla təqdimat elə, nəticə eynidir”. 
Müsahibimiz parlamentin ilk iclasında yaşadığı hissləri də bizimlə bölüşdü. Çox narahatlıq keçirib. İlk dəfə parlament binasına iyirmi il öncə qədəm basa bilib. Hansı səbəbdən getdiyini unudub, o dövrün millət vəkili Xanhüseyn Kazımlı ilə görüşdüyünü xatırlayır. Xanhüseyn bəy ona deputat köməkçisi olmağı təklif edib, ardından  “o qədər köməkçi var idi, indi deputat seçiliblər” izahını da verib. 
Razi bəy ikinci dəfə deputat kimi plenar iclasa qədəm basıb. O günü heç unutmayacaq yəqin. Belə deyir:  “Ciddi narahatlıq keçirirdim. Ayaqlarımda ağrı var, kresloda uzun müddət oturanda şiddətlənir. Düşünürdüm, cənab Prezident də iclasda olacaq və birdən o tərəf bu tərəfə çevrilərəm, ayağa qalxıb bir də oturaram, yaxşı qarşılanmaz. Onun üçün də erkən qalxıb həkimin məsləhəti ilə  düz bir saat yarım idman hərəkətlərini etdim. Çətin olsa da, farağat oturmağı bacardım. İndi öyrəşmişəm, hər şey gözəldir. Vaxtım və müalicə üçün imkanım olan kimi ya sanatoriyaya, ya da xəstəxanaya gedəcəm”. 
Razi Nurullayev siyasətə gəlməmişdən öncə, təşkilat rəhbəri, hüquq müdafiəçisi olub. O dövrdə hüquq müdafiəçiləri daha aktiv idilər. Söhbət təkcə cəmiyyətdə yaşananlara müdaxilədən, fikir bildirməkdən yox, ölkənin də hüquqlarını xaricidə qorumaqdan, təbliğ işinə dəstək verməkdən gedir. Bu günün millət vəkilindən haqqında danışdığımız sahədəki vəziyyəti qiymətləndirməyi xahiş edirik. 
Fikirlərinə bədbinlik saçan fadə ilə başlayır: “Bu sahədə vəziyyət ağırdır. İndi vətəndaş cəmiyyəti institutlarının çox ciddi maliyyə problemləri var. Azərbaycanda profesional, təcrübəli və savadlı hüquq müdafiəçiləri, təşkilat rəhbərləri yüzlərlədir. Onlar qarşılarına qoyduqları missiyanı yerinə yetirmək gücündədirlər. Bu isə hazırkı mövcud olan ictimai təşkilatlar haqqında qanunla mümkün deyil. Onun üçün də onları fəaliyyətsizlikdə qınamaq ən böyük ədalətsizlik olardı. Sözü gedən qanuna edilən məhdudlaşdırıcı müddəalar ləğv edilməyənə qədər vəziyyət ağır olaraq qalacaq”. 
Bilirik, qəhrəmanımız partiya sədridir. Onun rəhbərlik etdiyi partiyanın adı ilə eyni olan daha bir partiya var. Deməli, vəziyyətə Ədliyyə Nazirliyi qiymət verməlidir. Hələ ki, yenilik yoxdur: “Gözləyirik. Ümid edirik ki, məsləhətləşmələr və görüşlər olacaq. Sonunda, biz də bu məsələnin həllində maraqlıyıq”. 

Belə düşünək. Razi bəyin sədri olduğu partiya qeydiyyatdan keçib. Fəaliyyətində fərq nədən ibarət olacaq? Əqidə, yol, strategiya, taktika başqa partiyalardan hansı keyfiyyətləri ilə fərqlənəcək? 
Bəlkə də cavab var, ancaq biz eşidə bilməyəcəyik. Partiya sədri fikrini belə əsaslandırır: “İndiki halda partiya quruculuğumuzun fərqli keyfiyyətlərini sadalamaq çayı tullanmamış "hop" demək olar. Yaşayaq görək”.
Bəzən “yox” sözündən sonra “gör neynirsən deyənlər olur. Halbuki yoxdan sonra söz deyilməsin gərək. “Yaşayaq görək də söhbətin son nidasıdır, cavabında deyəcək söz yox. 

C.Musaoğlu



Oxşar xəbərlər