“Avto Cinema” MMC-nin ləğv prosesi davam edir. 

Bununla bağlı hələ fevral ayında məlumat yayılmışdı. Bildirilirdi ki, ləğvetmə elanında kreditorlardan iki ay ərzində tələblərini Nərimanov rayonu, Fətəlixan Xoyski küçəsində yerləşən "Gənclik Mall"dakı “Cinema Plus”a bildirmələri istənilir.

İddialara görə, prosesin uzanması MMC-də aparılan yoxlamalar, eyni zamanda kreditorlarla yekun anlaşmanın əldə edilməməsi ilə bağlıdır.  Qanunvericiliyə görə, hər hansı şirkətin ləğv etmə prosesi 1 il müddətində həyata keçirilməlidir. Bu müddət ərzində ləğvetmə başa çatdırılmırsa, o zaman prosesə yenidən start verilir. 

“Avto Cinema” MMC 31 avqust 2020-ci ildə təsis edilib. Nizamnamə kapitalı 100 manatdır. MMC-nin qanuni təmsilçisi Darab-zadə Zaur Mehrab oğludur.  Zaur Darab-zadə “CinemaPlus” kinoteatrlər şəbəkəsinin Müşahidə Şurasının sədridir. 

O, 2020-ci ildə keçirilən növbədənkənar parlament seçkilərində 23 saylı Nəsimi-Səbail seçki dairəsindən deputatlığa namizəd olub. Kifayət qədər uğurlu seçki kampaniyası aparmasına baxmayaraq nəticələr onun əleyhinə olub.  Zaur Darab-zadə bir müddət əvvəl yol hərəkəti qaydalarını pozmaqla gündəmə gəlmişdi. 

Dövlət Yol Polisi onun barəsində inzibati protokol tərtib etmişdi. Bu iş məhkəməyə qədər uzanmışdı. 

İddia olunur ki, Zaur Darab-zadə birinci insrtansiya məhkəməsini uduzsa da, apellyasiya mərhələsində qalib gəlib. 

Darab-zadə ilə bağlı daha bir maraqlı fakt onun 2022-ci ilin sentyabrında “Caspian Energy Georgia”nın direktoru təyin olunması, 2023-ün yanvar ayında, yəni 4 ay sonra bu vəzifədən çıxarılmasıdır. Onun hansı səbəbdə bu vəzifədən çıxarıldığı bəlli deyil./32gun.az/